الحب ليه معاني كتير،
واحد بيحب بلده، بيحب كلبه، بيحب دراسته وعمله، بيحب بيته، بيحب أمه، بيحب صديقه، بيحب نفسه..
إيه الفرق بينهم؟ وهل للحب أنواع؟
الحقيقة، آه فيه للحب انواع ومعاني..
واليونانيين قسموهم لأنواع منهم "فليو" حب الصداقة والعلاقات، و"ايروس" حب الالتصاق الجسدي، و "ستورجي" حب ما تمتلكه، و "آجابي" حب الإله الغير مشروط، و "براجما" حب الانتفاع والمصالح..إلخ
فلازم لما حد يقولك إنه بيحبك، تعرف هو بيحبّك حب إيه(من حيث نوعه/معناه)؟!
لو انت/انتِ بتدوروا على إرتباط فلازم تعرفوا الشخص الأول اللي هاترتبطوا بيه ويكون فيه صداقة قبل أي شهوة أو غرام أو تفكير في مستقبل العلاقة.
لو حد عايز يرتبط بيك هايهمه انت اكتر من اللي هاياخده منّك، هايهتم بالعطاء ليك اكتر من اللي هاتديهوله، هايبقى عايز يعرفك ويصاحبك ويقرب منك ويحترمك ويقدّر مشاعرك واحتياجاتك ويسمعك اكتر ما يهتم بنفسه واحتياجاته.
الكلام الحلو والإرتباط الغرامي والعاطفي بييجي بعد المعرفة الكافية ليك والاقتناع بيك والتعهّد الرسمي بالتمسّك بيك وبتكون ساعتها علاقتكم من أولها في النور وملتزمين فيها بحدودكم وعارفين فيها واجباتكم وحقوقكم.
ماينفعش تبدأ علاقة إرتباط وانت بس فيها محتاج حب او طالع من علاقة عاطفية قبلها مكسور ومجروح فمحتاج حد جنبك لأنها هاتبقى علاقة مشروطة وهاتنتهي بانتهاء الشرط والسبب، محتاج وقت ومحتاج تشتغل على نفسك وتقبل نفسك وتعرف أن الماضي مغفور ومنسي وان ربنا عنده بدايات جديدة ليك فاغفر للي جرحوك وكسروك واقبل انك تبدأ بداية جديدة!
ماتسمحش لحد يخدعك ويقولك "بحبّك" قبل ما يعرفك ويصاحبك ويقتنع بيك ويتمسّك بيك ويوعدك ويبان إنه ملتزِم ناحيتك فساعتها بعد إرتباطكم الرسمي وجوازكم تقدر تأتمنه على جسدك وكل حاجة فيك ومشاعرك، لكن قبل الإرتباط والجواز ماينفعش تصدّق أي حاجة مفيهاش التزام وصراحة وأمانة وعهد وماتفكرش ان حبكم لبعض هايزيد بعد التلامس والالتصاق الجسدي لأن العكس بيحصل وهو انكم هاتكرهوا بعض وتكرهوا نفسكم وتحسوا بذنب عميق ومعظم العلاقات دي مابتكملش ده بجانب انك ممكن تشك في سلوكيات شريكك لو عمل حاجة من غير عهد او شيء رسمي معاك او تخاف من خيانته المستقبلية ليك(من كتب علم نفس ومن قصص علاقات كتير)، اللي عايزك وعايز يرتبط بيك هايجيلك بشكل رسمي وفي النور ويحب يعرفك ويهتم بمشاعرك ويحترم شخصيتك ويعمل اعمال محبة ناحيتك وساعتها لو اقتنعت بيه وهو اقتنع بيك واتقدملك هاتوافق عليه وتأتمنه على كل حياتك ولما تتجوز هايكتمل حبكم مش بس بصداقتكم ومعرفتكم ووحدتكم النفسية والروحية لكن بالوحدة الجسدية والإلتصاق الجسدي ودي إحدى لغات الحب الخمس اللي بتبقى سبب في نجاح علاقات زوجية كتير وبتكون تعبير عن الحب وفي نفس الوقت بتزود الوحدة والحب ما بين الشريكين.
في النهاية باقولك، اتفق مع شريكك على حدود علاقتكم، حبّ اللي عرفته وصاحبته ومقتنع بيه، اتمسّك باللي بتحبه والتزم ناحيته، خليك عايش في صدق وصراحة وإخلاص وأمانة بينك وبين ربنا وبينك وبين شريكك، اهتم باحتياجات الآخر في العلاقة وماتكونش أناني، ماتشكش في حد وثق فيك وحبّك بجد وأأتمنك على كل حاجة في حياته ومقتنع بيك ومتمسك بيك وبيصارحك بكل حاجة لأن محبته ليك هاتطرح كل شك وخوف جواك، حافظوا على مشاعر بعض وقدّروها واحترموا شخصيات بعض وحقوق بعض واهتموا بأصغر تفاصيل بعض، اسمعوا بعض واسألوا على بعض طول اليوم، ماتنسوش لغات الحب اللي بتعضد علاقتكم وتنميها ولاسيما انك تعرف اللغة المناسبة لشريكك وتهتم انك تشاركه بيها دايما وهما: الكلام الحلو - الهدايا - وقت حلو تتشاركوا فيه وتتواجدوا فيه مع بعض - خدمتكم ومساعدتكم لبعض - التلامس الجسدي كالقبلات والاحضان وانك تمسك ايده/ايديها..إلخ
الحب الحقيقي عملي وفيه عطاء اكتر من الاخذ وفيه التزام وامانة ومش مجرد اقتناع عقلي او بس إحساس ومشاعر لكن مزيج بين الاتنين وفيه ضوابط وحدود وعليك مسئولية ودور وليه معاني وانواع ولغات، خليك ذكي و واعي وفاهم، وحافظ ع الناس اللي حواليك واغفر للي اذاك واتعدى عليك، واعرف نقط ضعفك واشتغل عليها واعترف باخطاء الماضي وماتكررهاش طالما انت صاحي و واعي وعايش في مخافة ربنا وفي القداسة، انت ملك ربنا وهاتكون لزوج/زوجة قريب فحافظ على نفسك عشان تستمتع بكل حاجة إدهالك ربنا وإدهاله في وقتها المناسب ومع الشخص المناسب وانتظر المتعة والإثارة الحقيقية في وقتها اللي نابعة عن حب حقيقي ومعرفة حقيقية مش غراميات ونجاسة وزنى وعهارة، ماتقعدش تدين نفسك ع الماضي لو اعترفت بيه وتوبت عنه لأنى مغفور ومستور وملوش ذِكر خلاص، الشعور بالذنب شيء مش صح لكن الشعور بالأسف صحي خاصة تجاه نفسك وتجاه الاخرين على كل حاجة عملتها غلط تجاه نفسك وتجاه غيرك مش في وقتها ومش مع الشخص المناسب وده هايخليك ماتكررهاش وتصحى لنفسك وماتستلمش للوقوع وماتستمرش في الغلط، استقبل نعمة ربنا وحب ربنا واتصالح مع نفسك ومع اللي حواليك ورحب بقوة ربنا وحاول تسيطر على نفسك وتضبط نفسك وتجاهد ضد كل شر وفساد ونجاسة وشهوة وإدمان، ربنا عنده بداية جديدة ليك وداعيك لحياة وخليقة جديدة فسلمه حياتك ونفسك وجسدك وروحك وهو قادر يسيطر ع الامور اللي خارج سيطرتك وإرادتك او يساعدك تتقبلها!
اتمنى لك الشفاء والتعافي يا صديقي/صديقتي.