خواطر - "فين؟" - كفاية فتور

فين اللي بيقعدوا قدّام كلامه وعند رجليه؟ فين اللي بيحبّوا يتمتعوا بحضوره؟ فين اللي بيبكوا قدامه عشان جهلهم وغباوتهم؟ فين اللي بيصرخوله ويعاتبوه طالبين انهم يفهموا طرقه وقصده ومشيئته؟ فين اللي بيقارنوا الروحيات بالروحيات؟ فين البسطاء والودعاء والمتواضعين والحزانى والمساكين والجياع والعطاش والاطفال اللي بينادوا عليه ومتمسكين بيه؟ فين اللي مصدّقينه وثابتين فيه مهما كانت شكوكهم واسئلتهم اللي فيها هاممهم انهم يعرفوه مش بس يعرفوا عنه؟ فين الحقيقيين اللي كلامهم طالع من قلوبهم وعقولهم واختباراتهم؟ فين اللي كل يوم بيبكروله ويقعدوا معاه في الخفاء عشان مشتاقين يشوفوه ويعرفوه ويعيشوا معاه؟ فين اللي بيتكلموا عنّه من كلامه وافكاره واقواله بس بدون اجتهادات واضافات بشرية ونفسية؟ فين اللي بيشهدوا عنه عشان اختبروه وعرفوه وداقوا حاجة عظيمة ومختلفة ونفسهم ينقلوها بشغف لكل اللي حواليهم عشان اللي بيسمعوهم يعرفوه ويحبوه مش لحب الظهور والاستعراض ولا لوظيفة وربح ولا لمجد الذات؟ فين اللي مصدقين في صلاحه وامانته وسيادته مهما كانت الظروف؟ فين اللي باصين ع السماويات ومهتمين بالروحيات؟ فين اللي إيمانهم عامل بالمحبة والخير والتضحية من غير شروط؟ فين اللي بيمتحنوا كل شيء من غير افتراضات مسبقة وتفسيرات خاصة وبحيادية وطمعانين في ملء الروح القدس كل لحظة؟ فين اللي بيحبوا يرنموله ويعظموه ويمجدوه ويمدحوه ويسبحوه؟ فين اللي لما بيتكلموا عنه ما بينقلوش من غير مراجعة واختبار ومابيقلّدوش؟ فين اللي عايشين معاه ومش ماشيين ورا افكار وتفاسير بشرية خاصة ورافضين يكون خرفان وسمّيعة؟ فين المدركين ومقتنعين بمحدوديتهم وعارفين انهم هايفضلوا يتعلّموا طول حياتهم؟
فين وفين وفين؟؟ إلخ
#فوقوا_بقى #كفاية_فتور