رسالة لكل شاب بيقول انه كوول!!

في ازمة عصرية في المراهقين والشباب عن ازاي يكونوا شباب كوول:
ناس فاكرة بتسقيطة البنطلون، او بقصّة الشعر بتاعة الشافعي، او بالبنطلون المقطّع، او بالتيشيرت ال GAP او اي ماركة عالمية معروفة، او بالجزمة Vans او Converse، او بالسيجارة اللي في بوقك، او الشيشة اللي في ايدك، او الكافيه اللي بتقعد فيه، او البنات لو انت ولد او الولاد لو انتي بنت اللي بنتصوّر معاهم، او بانك تقعد مع صحابك وتعمل اللي بيعملوه حتى لو عكس مبادئك تحت مسمّى انك متكسفهمش او ماتعقدهاش ومتحبكهاش ومتتروحنش فيها وبتسمي ده عادي او تفاريح، او انك تركب عربية موديل السنة وتظبط ازازها وصوت ماتورها وتمشي بسرعة اكتر من ٢٠٠، وانك تكون معترض على اي فكرة لمجرّد الاعتراض، وانك تفهم ان الحرية انك تعمل اللي انت عايزه من غير قيود او شروط، وانك تتريق ع الغلبان واللي على قد حاله واللي مش فاهم الاتيكيت والبرستيج واللي ماتعلمش يمسك السكينة والشوكة المسكة الصح، وانك يكون عندك جيرل فريند او بوي فريند من غير اي حدود وحتى وانت مش متأكد انها هاتكون مراتك او انه هايكون جوزك في المستقبل بس الموضوع بالنسبالك لمجرّد تقضي وقت حلو وتستمتع وممكن تغيّره كل اسبوع وكل يوم، وانك تنشر للناس اللي بيتابعوك ع السوشيال ميديا كل اللي بتعمله والاماكن اللي بتروحها واصحابك اللي تعرفهم وتخرج معاهم..إلخ
لكن إسمحلي اسألك شوية اسئلة:
هل انت إنسان سعيد؟ هل انت مستمتع بحياتك؟ هل اللي بتعمله حسسك بالشبع الحقيقي؟ هل كل اللي بتعمله بيفيدك ومابيضركش ولا بيضر غيرك؟ هل عرفت وفهمت انت مين وعايش ليه وقيمتك ايه؟ هل فهمت يعني ايه حب حقيقي؟ ايه اللي هاتكسبه لو كسبت وربحت كل اللي في العالم وخسرت نفسك؟ هل بتحس انك بتكدب ع الناس وبتكدب على نفسك؟ هل في حاجات بتعملها بتضر صحتك وتقلل تركيزك ومجهودك وانتاجك وهل انت انسان ناجح؟ هل الغنى والانجاز هو اللي هايديك معنى وقيمة وسط الناس؟ لو مُت دلوقتي هاتروح فين و لو انت عايش عايش لهدف ولا عايش بعشوائية وزي ما تيجي تيجي زي معظم الناس؟