جمل اتعوّدنا نسمعها ونقولها في #مصر:
ماينفعش دكتور نسا مسيحي يبقى استاذ في الجامعة
ماينفعش تبني كنيسة او دار خدمات من غير تصريح ولازم قرار جمهوري
ماينفعش تترقّى بسرعة لأنك مسيحي، ومستحيل تبقى رئيس وزرا أو رئيس جمهورية
ماينفعش تلتحق بالشغلانة دي عشان انت مسيحي
ماينفعش تطلع الأول عشان انت مسيحي
ماينفعش ترد ع الناس اللي بتسألك عن إيمانك ومسيحيّتك ولاتوزعلهم تعاليم المسيح ورسائل الخير والحب
ماينفعش ..... إلخ
عيشنا وشفنا وعرفنا وقرينا ان #المسيحي_في_مصر مواطن درجة تانية، ممكن نص مواطن، كوفتس، عضمة زرقا، نصراني، كافِر، قبطي، ..إلخ
مشكلة #صفر_مريم الخاصة بالثانوية العامة مش مشكلة مريم بس دي مشكلة ناس كتير تانيين في الحضانات والمدرس والجامعات والتقديم على الوظائف وتقديم الاوراق الرسمية والعمل العام.
مش جديد اللي بيحصل في مصر، بل بالعكس باظن واعتقد انه هايستمر وهايسوء طالما مافيش تعامل ثوري عملي ثقافي تنويري قدام كل جهل وتخلّف وظلمة وغش وفساد وزيف وباطل.
عمرنا ماهانتقدّم طالما بنتعامل مع البشر بتصنيفات وطبقات وبطريقة مادية تنافسية عنصرية، التقدّم هايبدأ وهانوصلّه لو اتعاملنا مع كل واحد على إنه إنسان وفرد فريد.
اوحش حاجة اننا كمسيحيين بنتعامل مع المواقف اللي بتحصل زي مريم بتعامل سلبي يا إما نهاجر ونسيب البلد وده باسميه هروب، يا إما بنسكت خالص ومانتكلّمش إلا في غرفنا المكيفة ومواقع التواصل الإجتماعي.
التغيير والثورة تغيير من الجذور، يبدأ بكل واحد فينا بنفسه، وانتقادنا لازم يكون إيجابي بنّاء، وتحركاتنا لازم تكون عقلانية جديّة مستمرة مصيرية.
موضوع مريم مش بس للمسيحيين لأ بقي على كل المصريين، الكل بيعاني، الحاجة الوحيدة اللي بترخص في بلدنا هي المواطن، الإنسانية معدومة، أولوية الحكام هي السلطة وليس الشعب!
مصر في منحدر خطير من الفشل والجهل والغش والفساد والعشوائية والفوضوية في إدراتها وشعبها بيعاني من الظلم والاكتئاب والعبودية والجوع والفقر والإحباط وعدم الأمان.
المشاريع العملاقة لا تنفع المواطن المصري الفقير الغلبان يا حكومة ويارئيس، الشعب ده عايز ياكل ويعيش مرتاح ومستقر ويلاقي فرصة كويسة للتعليم والعمل بدل ماخليتوه يكره نفسه وبلده!
المسيحي عليه دور انه ما يستسلمش للذل والعبودية والمهانة والظلم والتمييز والعنصرية دي، لازم يكون ليه صوت ودور،لازم يكون ليه تأثير و رسالة،لازم يقول لأ لكل تصرف ظالم وغير إنساني.
مش معنى إنك إنسان مسيحي ومؤمن إنك تكتفي بس بالصلاة وتسيب حقّك يضيع ويتداس على كرامتك وتتهان، ليك دور ورسالة وصوت وعمل، اقف ضد كل ظلم، اصنع الحق، اطلب الرحمة، ارحم الفقير والمسكين، اسلك متواضعاً امام إلهك، ربنا عنده حل لكل مشاكلنا بس نطلبه ونشتغل معاه وننشر النور والحق والخير والحب للبشرية. لكل زرع حصاد، فانتظروا عدالة السماء.
#دموع_مريم دي دموعي ودموعك، اصرخ لأجل البلد لو شفت ظلم الفقير ونزع الحق في البلاد، ماتخفش، رب الكل وسيد الارض وملك السماء وخالق الإنسان وفاديه موجود ويقاتل عنّه!
ليك دور، إنهض قوم!
#إنهض_مصر_يارب