اخويا الخادم، قبل مابدأ مقالي مش عايزك تزعل منّي في اللي هاكتبه هنا!
الخدمة الروحية مش بتتقاس بحجم اللي بتعمله، فالله لا يهمّه الكم لكن الكيف أي الدافع والنية وراء ما تفعله، يمكن تكون(وده رأي الأغلبية)بتشوف ان الخدمة المنبرية الوعظية التعليمية الكرازية هي أعظم وأعلى خدمة لأن الميديا وصلت كدة بجانب بعض الكتابات اللي وصلت نفس المفهوم، ولكن تخيّل لو كل الكنيسة وعّاظ ومتكلّمين مين هايرعى ويسأل ع الناس ويفتقدهم ويتابعهم ويساهم في إحتياجاتهم الروحية والنفسية والجسدية ومين هايسمعهم؟!
ناس كتير بتزعل لما بيُكلَّفوا بخدمة غير الوعظ المنبري لأنّهم فاكرين ان الخدمات الباقية أقل مستوى منها لكن اسمحولي اقولّكم ده صغر نفس ونقص فينا!
الخدمة مش بتدينا قيمة وهويّة، بل بالعكس اللي بيخدم لازم يكون عارف قيمته وهويّته الحقيقية فمابيتصنّعش وبينافق وهو بيخدم أي خدمة، لكنّه حقيقي!
الخدمة مش في وقت فراغك ولما مزاجك يبقى عالي، لكن ده الحياة كلها غرضها خدمته وتمجيده في السر والعلن في الفعل ورد الفعل والقول!
الخدمة مش في مكان مريح ولناس مريحة وبأساليب مريحة(مع ان كويس لو كانت موجودة الحاجات دي) لكن المهم فيها ان الله يكون آمر بيها وراضي عنها!
الخدمة مش بالمؤهّل والدرجة العلمية، لكن بدعوة الله لشخص مؤمن ممتليء بروح الله مهما كانت درجته العلمية لكنّه بينمو في النعمة وفي معرفة إلهه كل يوم!
الخدمة مش بس في الكنيسة المحلية، لأ دي كمان في الشغل والبيت والشارع والمواصلات والجامعة والمدرسة، اخدمة بسلوك كامل أمامه، اخدمه بحياة الشكر، اخدمه برحمة المسكين وتشجيع صغار النفوس وصنع الخير للفقير واحتمال الضعيف!
الخدمة مش بالوراثة، ربّنا ماعندوش أحفاد، الخدمة ليها منطق وهدف وعمل ونيّة وسلوك وحياة شاهدة مقدّسة!
الخدمة مش بأعداد اللي بتخدمهم، لكن بإدراكك قيمة وأهمية كل نفس، الخدمة خدمة نفوس مش أعداد!
لو عايز تخدمه، اسلك قدّامه بأمانة في كل وقت وكل مكان وكل ظرف
لو عايز تخدمه، اشكره في كل شيء وكل حين
لو عايز تخدمه، اسمع صوته وشوفه عايز منّك ايه واقرا كلامه واعرف فكره ورأيه
لو عايز تخدمه، اتواضع واعمل في بساطة و وداعة وطول أناة وتقوى حقيقية
لو عايز تخدمه، اخدمه في الخفاء قبل العلن بدافع تمجيده وارضاؤه
لو عايز تخدمه، حبّه من كل قلب، اعبده بقلب كامل ونفس راغبة
لو عايز تخدمه، اخدم ولاده، وكل اللي مات لأجلهم وحبّهم
لو عايز تخدمه، اخدم زي خدمته لما جه وعاش ع الارض
لو عايز تخدمه، اغسل رجلين اخواتك وقدّمهم عنّك في المسئوليات والاحتياجات
لو عايز تخدمه، ماتستناش مقابل من الناس ولا تقييم بشري، اطلب واعرف تقييمه بس، ماتطلبش مدح الناس وتعظيمهم ليك، اطلب انهم يشوفوا ربنا فيك!
تعليقات
إرسال تعليق
شاركني تعليقك و رأيك فيما قرأت , رأيك مهم جدا I need your Comment!