ونعمِل إيه في الإكتئاب؟!
نروح لدكتور نفسي؟ صدقني فيهم طبيب متديّن، وطبيب كيميائي!
نروح للخدام ورجال الدين؟ صدقني بيتكلّموا اكتر ما بيسمعوا!
نروح للأهل والأقارب؟ كل واحد مهتم بنفسه واللي شاغل باله!
نروح للاصحاب؟ بتوع مصالحهم وتعزيّتهم مُتعِبة وكلامية!
نروح لمواقع التواصل الاجتماعي وغرف الدردشة؟ مش كلّهم بيردوا، ولما بيردوا مافيش حد فيهم عنده وقت ليك يقرا كل اللي بتكتبهوله ويرد على كل اللي بتسألهوله!
نروح للكتب؟ مش كل إجاباتك هاتلاقيها فيها، ولو لقيت إجابات ممكن تنطبق على نوعيات اخرى من البشر غيرك وماتكفيش حالتك ولا تريّحك للدرجة المطلوبة!
نروح للأماكن الهادية للخلوة؟ مش حل مثالي وعملي، لأن طبيعتك علاقاتية ولازم ترتبط بمجموعة وناس حواليك، ده غير ان الوحدة لوقت كبير قاسية وصعبة ومعرّض فيها للهزيمة والسقوط لو سبت نفس لوقت فراغ كبير بلا عمل أو مشغولية!
نروح للبلاد الاخرى اللي حوالينا؟ مافيش فرق، رب هنا هو رب هناك، والشر في كل مكان، وزي ما بيقوله مافيش فرق بين أحمد والحاج أحمد!
نروح للكيميا والمخدرات والإدمان والعلاقات العاطفية(الوقتية-الوهمية)؟ حلول مُسكّنة لوقت قصير، ومن وراها اضرار كتير مش بس لنفسك لكن لغيرك، والمشكلة هاتزيد!
نروح للأديان والفلسفات الأخرى؟ صدّقني المشكلة مش في ديانة أو عقيدة هاترتبط بيها بقدر إيمان حقيقي صادق منطقي يغيّر الداخل ويعطي إجابة لأهم أسئلتك وخاصةً القيمة والهوية والمعنى والوجود والألم والرجاء والاخلاق!
طيب نروح لمين؟ صدقني مش عايزة غير أبو الأرواح، والطبيب العظيم، والذي يشفي كل امراضنا، والذي يغفر ويحرّر ويشفي ويجدّد الذهن بكلمته الحية الفعّالة الصادقة النقية، مش عايزة غير انّك تترمي عليه وتحتمي فيه وتتصل بيه(في صلاتك)كل لحظة وتصارحه بوضوح بكل اللي فيك والظروف اللي حواليك واطلب منّه انّه يكلّمك بطريقة واضحة وصوت مسموع ويظهرلك ذاته وهو ليس عن كل واحد منّا ببعيد، الرب قريب لكل الذين يدعونه!
(ملحوظة:لا للتعميم،ولا ألغي دور الطب والكيمياء العلاجية ولا العلاقات الناضجة والدور الروحي الخدمي والتدريبات الروحية والقراءة العميقة بحيادية والبحث عن الإنسان والله بإخلاص،ولكِنّها حلول جزئية يستخدمها الله لرد كل نفس فينا وشفاءها وتحريرها ومعافاتها من أصعب الأمراض النفسية،وأرّحب بالنقاش والنقد البنّاء على أسس علمية وروحية وإختبارية حقيقية)
كلامك صح بس اوقات بنحتاح نتكلم عشان نرتاح.. كورس شفا النفس ليه دور كبير ف الموضوع ده وخصوصا وسط جماعة مؤمنين وصلاة وجو روحي..
ردحذف