رسالتي للمراهقين - 2 - الوقت

ايه ده؟

اليوم ضاع, ماستفدتش منه أي حاجة!

دايماً أمي بتقولّي "الوقت كالسيف" – وأبويا يقولّي "اشتري الوقت" –

و المثل بيقول"الوقت فلوس" .. و "وقتك وكالة" و .. الخ

ومرة واحد قالي "نفسي يبقى اليوم 48 ساعة في ال 24 ساعة عشان اقدر اخلّص حاجات اكتر!"

وكل واحد فينا عنده "وقت فراغ",والماتش فيه "وقت ضايع",

وباحب انام 8 – 12 ساعة في اليوم، وباقعد على فيسبوك وتويتر اكتب واتابع اصحابي و يوتيوب اتفرّج على شوية فيديوهات وافلام واغاني وترانيم و اعمل شير للي بيعجبني و اكتب تعليقات و اتشارك مع الناس وممكن وقت النت ده ياخدله 4 – 5 ساعات، و ساعة في الحمام، وساعة أو ساعتين تليفزيون أفلام بقى وماتشات، وممكن انزل اتفسّح او اتمشّى أو اروح اقابل اصحابي او اروح الكنيسة او ازور قرايبي .. ويبقى كده اليوم خلِص!

أنا عارف ان كل اللي فات ده بيحصل معانا، وفي نفس الوقت في حاجات فيه حلوة ومطلوبة كتير، لكن ايه المطلوب ممنا في سننا ده قدام وقتنا ويومنا اللي بيعدي بسرعة؟؟

ماتفكرش اني هاكتبلك نصايح وروشتة متعبة ومستحيل انك تحققها لكن انا عايز اتناقش وادردش معاك عن أهمية الوقت، وباختصار عشان وقتك!

وقتك مش بس فلوس، وقتك هو حياتك .. كل حاجة بتعملها في وقتك بتأثّر على شخصيتك، كل حاجة بتقوم بيها وتفيدك وتكبّرك وتنمّي شخصيتك وقدراتك ومهاراتك وعلاقاتك هي أحلى استفادة واستغلال للوقت، كل وقت بتجتهد فيه وتتعب وتكافح وتعرف فيه في دراستك وشغلك وعملك مهما ان كان هايفرق معاك في مستقبلك وكفاية انك بكده انسان أمين ونشيط.

حط جدول منظم لوقتك اليومي ولو حتى ع الموبايل أو التاب أو اللاب بتاعك عشان تكون عارف انت هاتعمل ايه انهاردة، اعمل وقت للرياضة(مشي، سباحة، كرة، تنس، بنج بونج، باسكت، جري،..)، وقت لمواهبك(رسم، موسيقى، برمجة، ترجمة، تأليف، تلحين، شعر، بحث، ..)، وقت للقراءة ولو 5 – 10 صفحات يومياً و زوّد بالتدريب والتدريج، وقت لسماع الموسيقى الهادئة، وقت للمشي والخروج مع الاهل أو الاصحاب أو الاقارب، وقت للهدوء مع نفسك ومراجعة نفسك وقراراتك وأفعالك وردود أفعالك في كل يوم لتصحيح أخطاءك والتخطيط لبكرة، واخيراً وقبل كل شيء وقت لربنا، تتكلّم ومعاه في صلاتك اللي بتصارحه فيها بأسرارك وكل مشاكلك والتحديات اللي قدامك واحتياجاتك وكمان تشكره على كل اللي بتختبره معاه في رحلة حياتك اليومية، ومش بس تكلّمه لكن خليه يكلّمك من خلال كلمته اللي بتقراها بانتظام ودراسة منتظمة عميقة مش 5 دقايق تيك أواي، لكن وقت خاص لربنا، وقت كبير وغالي عليك ومنتظم وأمين فيه بتتقابل فيه مع الهك وبتشكره وبتحمده وبتكلمه على اللي جواك وبتعترف وتتوب عن كل حاجة اخطأت فيها وتوعده انك ماترجعلهاش تاني وبتسمع صوته في كلمته (الكتاب المقدس) في قراياتك اليومية فيها وممكن انك تنسى مرة تاخدها أو ماتفهمش فيها كلمة أو جملة كل ده وارد يحصل معانا كبير أو صغيّر لكن خليك أمين ومنظّم وزي ما بتدّي مواهبك واصحابك ودراستك وشغلك وقت، خلّي لربنا وقت منظّم ويُفضّل انه يكون في أوّل اليوم عشان ده هايفرق معاك في باقي يومك في تعاملاتك وعلاقاتك وأفعالك وردود أفعالك وقراراتك، وماتخليش لربنا وقت معيّن بس، لكن خليك في مخافته اليوم كله، حطّه قدام عينيك، شوفه في كل مكان وكل موقف، عيش بقداسة وتقوى وماتحاولش انك تزعّله وبُص عليه واطلبه في كل مشكلة وارفض وقول لأ للخطية وعيش منتصر وربنا وحده اللي هايساعدك تعمل كل اللي كنا بندردش فيه ..

ياترى عندك وقت لربنا؟!

خليك أمين ومنظم وملتزم عشان تكون انسان ناجح في كل شيء وتشهد عن الهك بنجاحك وربما تفوقك نفسياً وعلمياً وروحياً.