المحرومين - سام

  

انا سام,

على فكرة مش هاطوّل عليكم

انا عارف ان انهاردة يوم التدوين عن " التحرّش الجنسي " فقولت لنفسي اكتب حاجة و اشارك, مش دي ايجابية برده و لا ايه؟؟

يالا بقى نبدأ في الجد !

انا فكرت كتير في تسمية الموضوع و مالقتش غير اني اسميه "المحرومين"

باقول دايماً  اننا عايشين في ثقافة شرقية عربية و دايماً بيوصفوها بالانغلاق و الكبت و القيود اللي مش معروف اسبابها

بس ليه يا ترى ؟؟

انا في رأيي باقول ان السبب اللي خلانا كده هو انتشار الجهل ما بينّا و عدم التفكير و البحث و القراءة و اتخاذنا بالمُسلّمات و عدم استعمال العقل اطلاقاً

من بداية تربيتنا لأولادنا بنعلمهم انهم يعيشوا العيشة اللي احنا عشناها قبلهم و تستمر الحياة كدة لحد ما بنطلّع اجيال ما بتعرفش تفكّر و لا تتصرّف الا بتصرفات اللي قبلها و بدون تفكير و بدون بحث و بدون اختلاف.

عايشين زي ماحنا, مافيش تغيير,مافيش تفكير, مافيش تنوير !

عرفتوا بقى احنا ليه محرومين, لما راجل بيمشي في الشارع و يقعد يبص على واحدة ماشية مابيبصش عليها بصّة محترمة لكن بصّة شهوانية و ممكن تكون بصّة عدوانية و كلها بصات شرانية

ليه ياترى؟

اكيد عرفتم ليه, انغلاقنا و كبتنا و القيود اللي عاملينها لنفسينا و بدون تفكير و بحث فيها و بدون تغييرها هي اللي وصلتنا لكدة !

ارحمنا يارب

علاجنا : التفكير ثم التفكير ثم التفكير

لو عقلنا اشتغل و لو لمرة, ممكن نتغيّر

و هانعرف ساعتها ان الست و البنت اللي ماشية في الشارع دي بني ادمة زي الراجل بالظبط ربنا خلقنا واحد مافيش فرق ما بينّا احنا البشر اللي عملنا فرق ما بينّا

مهما كان عندنا من مباديء و اخلاقيات و تعليم نظري في مدارسنا و جامعاتنا, برده مش هايكفّي, المهم اننا نتعلّم اننا نشغّل مُخنا, اننا نحترم نفسنا , اننا نغيّر وجهة نظرنا عن الاخرين, اننا مانؤمنش بالمُسلّمات مانغير مانكون بنبحث عن اقتناع فيها, اننا نمحي الجهل اللي عايشينه اللي مورّثنا عادات و تقاليد و ثقافات خاطئة علّمتن الكبت و الانغلاق و فرض القيود الوهمية

كفاية كدة

يارب اكون عرفت اوصّل فكرتي البسيطة اللي مارتبتلهاش كتير من الافكار, سامحوني على تلقائيتي في الكتابة

سام

لو عايز تقرا رأيي في التدوينة السابقة عن التحرّش الجنسي اضغط على اللينك ده http://samtfikry.blogspot.com/2011/06/blog-post_20.html

samfikry.com