انا عندي ارادة قوية - سام

 رسالتي لكل  مُدمن, و باختصار,,

قول معايا الكلام اللي هاقوله ده و فكّر فيه كويّس جداً و ركّز اوي و مش هاطوّل عليك, مجرد هاخد من وقتك دقيقة او دقيقتين بالكتير ممكن يغيّروا حاجات كتير في حياتك, بس خليك معايا !

" انا انسان !

انا مش صدفة هنا

انا مش كائن و مخلوق عادي

انا كائن روحي عاقل ناطق

انا مُميَّز و على صورة الله و من صنعه

انا نِتاج ابداع و حُب الهي

انا مش هالاقي شبعي في امور بشرية وقتية ارضية,

انا كائن سماوي روحي و شبعي مش في أي حاجة غير في الهي اللي فيه كل كفايتي

انا مش مخلوق مُصيَّر, انا مُخيَّر و ليَّ ارادة قوية و عزيمة الهية منحها ليَّ الهي

انا مش هاستسلم لإدماني و لسقطاتي و لضعفاتي و للهزيمة المُتكرّرة

انا عايز اعيش انسان تاني, انا عرفت ان ليَّ ارادة قوية, مش مني لكن الهية !

انا عايز ارادتي تكون زي ارادة الهي, اعمل اللي هوَّ عايزه منّي و اللي يرضيه بحُب و رضا مش بالإجبار

انا كائن عاقل و ربنا ميّزني بالعقل و التفكير, و لازم اعرف ان طرقي اللي مش صح دي ما بتفيدنيش و إدماني و عاداتي و شهواتي و ذنوبي الكتيرة دي ما بتشبعنيش, لكن بالعكس دي بتضُرِني

انا عايز اعيش و ادوق طعم النُصرة

انا عايز اقول للشر " لأ و كفاية "

خلاص , انا هارجع لابويا و الهي الحنان , و هاقوله على كل اللي فيَّ و اللي مضايقني و اللي مهزوم بيه و اللي باعمله

خلاص , انا هاقولّه انا مش قادر اغيّر نفسي , انا باسلّمك ياربي ارادتي و عزيمتي و حياتي, انا مهزوم , غيّرني و قوّي ارادتي و عزيمتي  اللي سيطر عليهم ابليس

خلاص , انا هاقولّه انّي مالقيتش شبع في العالم اللي حواليَّ و لا في شهواتي و عاداتي و بُعدي عنّك, انا هارجع ليك و اكيد هالاقي فيك الشبع في قربي منّك لما ارمي كل حمولي و اثقالي عليك و هاتُحضُنّي و هاتغيّر فِكري و دوافعي و هاتنقيني و تطّهرني من فسادي و اعوجاجي الدائم

خلاص , الحل ياربي فيك , انا مش هارجع تاني للهزيمة و الانكسار و العار و الجوع اللي لقيته في بُعدي عنّك .

امين "

الله معك

سام