ايه اعلى و اسمى و ارقى هدف لحياتك ؟!
فيه ناس هدفها النجاح في حياتها العملية , و ناس تانية هدفها اقامة الصداقات و العلاقات العاطفية , فيه ناس هدفها الزواج و النسل و تربية الاولاد و العناية بهم , و ناس تانية عايزة بس كل يوم تلاقيلها اكل عيش و وجبة ع الاقل تاكلها و تنام عشان تغلب جوعها و فقرها الفاحش.
كل واحد فينا ليه اهدافه الكتير في حياته , بس اللي شاطر يرتّب اهدافه صح من الاسمى و الارقى و الاعلى و الاهم للاقل قيمة.
خلّي بالكم, الانسان الناس بتعرف قيمته من اهتماماته و اهدافه الحياتية اللي باينة في شخصيته و اسلوب حياته, فخلّي بالك و حدد اهدافك و رتّبهم صح, بس في رأيك ايه هو الهدف الأول في حياتك في ترتيبها ؟َ!
فيه ناس بتقول اكل العيش و الخلفة و الجواز و العلاقات و النجاح العملي و المؤهلات العُليا و الفُسح و الرحلات الاستكشافية و ممارسة الهوايات زي الموسيقى و الرياضة و القراءة و الكتابة و السباحة,و حاجات تانية كتيييير.
بس عشان ما اطوّلش في الحوار معاكم, خلينا نجيب م الاخر احسن, الهدف الاوّل هو اسمى هدف و اللي يستاهل يكون في الاوّل و هو اللي بيكون محور اهتماماتك, و انا ماباحبّش الروحنة و التديّن الظاهري, بس في رأيي الهدف الأوّل هو تمجيد الله و ارضاءه.
يعني ايه تمجيد الله؟!
يعني اظهار و اعلان صفاته و طبيعته و حضوره و صلاحه و ابداعه الخلقي و قدرته لكل البشر من خلالنا.
كتب الكاتب الرائع الشهير ريك وارين عبارة في كتابه"الحياة المنطلقة نحو الهدف" يقول فيها:
" ان الحياة لتمجيد الله هي اعظم انجاز نستطيع تحقيقه في حياتنا "
لما الكائنات و الطبيعة كلها اللي خلقها ربنا تقوم بدورها اللي ربنا خالقها ليه فهي بكدة بتمجّد ربنا.
لما تعرف انّك مخلوق مُميّز من الله و كائن روحي عاقل لا تجد شبعك الا في الله, بكدة هاتعرف تعيش الحياة اللي ليها معنى و ليها هدف.
لما تعرف انّك مش صُدفة و مش متروك للصدفة و ان ربنا عاددلك خطة صالحة لطريق حياتك و مش سايبك تخبّط و تلف و تدور كدة و خلاص, هاتعرف تعيش الحياة اللي ليها معنى و هدف و تتمتّع بحياتك.
لما تعرف تمجّد ربنا و ترضيه في حياتك و يكون ده هدفك الاوّل, بكدة هاتكون بتحقّق غرضك اللي ربنا خالقك عشانه و هو انّك تمجده و ترضيه و تعلن للكل عن قدرته و سلطانه و ابداعه و حبه و رحمته و صلاحه, و بكدة هاتكون اسعد انسان في الدنيا لأنك عايش مش زي باقي العايشين اللي عايشين في تفاهات و امور عادية وهمية زائلة و مش دايقين طعم السعادة و لا مُتعة الحياة و لا مُدركين ان احسن هدف الواحد يعيش عشانه هو انه يمجّد ربنا و يرضيه و ينفّذ كلامه عن حب و طاعة و خضوع و ليس عن اجبار.
الله معكم,,
سام
شكراااااً كتير ع المجهود :)
ردحذف