فاكر نفسك حكيم
وذكي وفهلوي وفهيم
و كأن ده من نفسك
مـش م الله العلـــيم
عايش حياتك بفتاوي
اللي بس بتنفعك
و اللي مش ماشية معاك
رافض كل اللي يمنعك
فاكر نفسك مش عادي
وفي الناس عمال بتعادي
فاكر انك بس الصح
و بباقي الناس مش راضي
فاكر نفسك اسطورة
و بطل من الابطال
و طاير زي العصفورة
رجل مش م العيال
فاكر نفسك العالي
عايش ع الناس متعالي
و كأنك مش منهم
من كوكب تاني يا غالي؟؟!!
يا انسان
ليه بتتعالى على رب الاكوان
ليه شايف نفسك يا فلان
الفضل كله فيك لربنا المنان
يا صديقي
الشطارة مش بالقدرات
و لا عشان عندك مهارات
اوعى تقول "غني و مستغني"
عن ربك , اصحى , دي خرافات
ما تعش يا صديقي اناني
و لا متكبر و مكتفي
خليك طيب و كون انساني
و متواضع و مختفي
ما تعش في كبريا
ولا في الاكتفا الذاتي
عيش في وداعة و بساطة
و اكتفي بربك العاطي
انت مش حي لنفسك
دي حياة هاتبقى مملة حقيرة
حب اللي يعاديك و يحبك
دي حياتنا ع الارض قصيرة
ما تطلبش بس لنفسك
اطلب الخير للاخرين
و اعمل الخير للبشر
من غير اجبار و لا انين
الحكمة مش خبرات
و لا شوية دراسات
ولا تبادل ثقافات
دي الحكمة اسلوب حياة !
بدايتها مخافة الله
و العيش بس في رضاه
و سماع كل كلامه الحي
و كلامه طيب و ما احلاه !
علاجك زي علاجي
انك تعرف الله
مش بس تعرف عنه
لأ , تتقابل معاه
انا عرفته و قبلته
و اعترفت بكل احسانه
و بمراحمه ليا و حبه
و صلاحه ليا و حنانه
حبه ده مش متناهي
حب ازلي و ابدي
خلاه يتنازل ليا
و يجيلي لحد عندي
حبه مش حدوتة
و لا قصة زغنتوطة
و لا اغنية و جملة
ده مات عني اصعب موتة !
جه و ضحى عشاني
و عاش قبلها بيعاني
و حمل كل ذنوبي
و من الهلاك نجاني
ليه عايش بقى متكبّر
ليه فاكر نفسك حاجة
عيش لربنا و قدّر
ان هو كل حاجة !
ارمي عليه كل احمالك
و خطاياك التقيلة
سلمله كل مخاوفك
و حياتك الهزيلة
هو اللي بيضمن بكرة
و يحقق كل امالك
و عنده ليك الرجا
و عزا و شفا لأسقامك
اطلب رحمته و حنانه
اطلب حبه و غفرانه
ده بابه ليك مفتوح
اترمي جوة احضانه !
سام
12 – 12 - 2011
الله معك
تسلم ايديك
ردحذفراااااااااااااااائع
ردحذفشكرا للمشاركة و التشجيع , انشروا المقالات و الاشعار اذا اعجبتكم , شكرا لزيارة المدونة البسيطة
ردحذف