باختصار , و بدون اطالة و كلام كتير , هاتكلم معاكم في اول بلوجة و تدوينة ليّ باللغة العامية المصرية و يارب الكل يفهمها !
انا طالب جامعي في كلية طب و باعتز اني واحد فيها و كأني في حلم مش مصدّق اني فيها لاني كنت باتمنى من صُغري اني ادخلها زي اي واحد بيتمنى يدخل اي كلية !
بقالي فيها اربع سنين لحد دلوقتي و اللي هاكتبه ده حقايق و باختصار و بواقعية و بدون اطالة زي ما معودكم في مدونتي البسيطة المتواضعة الخفيفة !
من اول سنة كلية كان نفسي اتعرّف على ناس زيي في الشخصية او بمعنى اصح قريبين مني و في كيميا ما بينّا في التعامل و في انسجام و بالفعل دورت و فتشت كتير و اتعرفت على ناس اكتر من شعر راسي في سني و اكبر و اصغر مني لكن حتى الان بعد اربع سنين تفتيش مالقتش حد و لكن باتعامل مع الكل بمحبة و ببساطة و بكل امانة و صدق و باحب الكل فعلا بس ما زاملتش حد لحد دلوقتي , هو ده عيب فيّ او خطأ فيّ ؟؟!! ردوا عليّ ياللي بتقروا ما تسيبونيش متحيّر !
و هاتكلم معاكم في شوية نقط واحد اتنين تلاتة كدة على الاهتمامات اللي الناس بتهتم فيها في الكلية و اللي لاقتها في كل النوعيات هناك :
1 – المظهر و الشكل الخارجي
2 – المستوى الاجتماعي و الاقتصادي
3 – التفوق الدراسي
4 – التديّن الظاهري و عمل احزاب دينية و مجموعات دينية سواء مسيحيين او مسلمين
5 – صداقات ليس في وقتها بين الجنسين
6 – ضحك و هذار و تريقة و نميمة و حسد و سخرية و قلة ادب و شتيمة
7 – تدخين و شيشة و حاجات تانية بلاش اقول عليها
8 – ناس عايزة تتعلّم و بتيجي تتعلم بس و تروّح بيتها بعد كدة او بيقعدوا يذاكروا في الكلية او يقروا كتب في المكتبة
9 – عراك و خناقات و مشاجرات
10 – لعب كورة و انترنت
11 – تعارف و مصاحبات
12 – تضييع وقت
13 – وحدة و انعزال تام و انطوائية , و اتعاطف مع هذه الطائفة اللي مش قليلة !
14 – احزاب سياسية و تكتلات اجتماعية و علمية و دينية
15 – مثقفين و سياسيين
كفاية كدة , ده اللي شوفته لحد دلوقتي و ماتوقع اشوف اكتر من كدة قريّب !
لكن الخلاصة اني مش عارف اقول ايه على كل طائفة من الناس دول , يالا كل واحد براحته المهم اني استفدت حاجة و محتاج رأيكم فيها .
استفدت اني لازم انسحب من كل مجموعة او زميل يُضيّع وقتي و يجعلني اخطيء قدام ربنا و قدام الناس , استفدت اني لازم اعيش زي ما انا برة زي ما انا في الكلية بواقعية و بصدق و شفافية تامة , استفدت اني اروح بس لطلب العلم و الدراسة لان الجامعة اتعملت لكدة , استفدت اني ماليش دعوة بالمتدينين و الجماعات الطائفية اللي في الكلية سواء دينية او اجتماعية او سياسية فالحاجات الدي ممكن بس خارج الكلية , في النهاية حابب اقول لكل النوعيات دي لو انت منهم : احب اقولّك " لو عرفت انت عايز ايه , هاتعرف انت هاتعمل ايه , حاول ترضي ربنا في اللي بتعمله و تعيش امين معاه و ما تغضبهوش و لا تعصيه , حاول تخاف ربنا في السر و العلن , حاول تعيش زي مانت مش بوشين , حاول تحب الناس كلها و تبقاش طائفي او متديّن ظاهري او متشدد , حاول انك تكون مثقف و متعلم و تسأل نفسك في كل حاجة بتعملها هل انا فعلا باستفيد و بارضي ربنا من اللي باعمله ده و لا الكلام ده بيغضبه و ضد مبادئه , ربنا مش بيقيدنا و لا بيشترط علينا , ربنا بيحب القداسة و الطهارة و النقاوة في الفعل و القول , ربنا مش عايزنا نكون مسجونين و مأسورين في شوية افكار و عقائد , ربنا عايزنا مفتوحين للكل و بنحترم الكل و بنتناقش مع الاخر في كل حاجة و لكن في الوقت المناسب , لكل حاجة وقت , احذر من تضييع الوقت فالله وكلك على وقتك .
في النهاية احب اقولكم , اني اخدت عهد مع نفسي من السنه دي في الكلية , اني مش هاروح الكلية يوم و اضيّع وقتي في كلام فارغ يتعارض مع هدف ذهابي لها , فوقتي ينبغي ان يكون منظّم و استفيد بيه في حاجات مفيدة و نافعة ليّ و للاخرين .
اسف ع الاطالة !
الله معكم
سام
29 – 10 - 2011
احلى ايام بتاعة الجامعه دى
ردحذفكلامك ده كلنا عدينا عليه وشوفناه،هتعدي السنين والحياه الجامعيه هتفضل زي ما هي!!!!
ردحذفحلو انك خرجت بره الدايره بتاعه الحياه دي وبصيت علي الموقف من بره علشان تعرف انت عاوز ايه؟هدفك من دخول الجامعه ايه؟وترسم لنفسك الخط اللي انت عاوز تكمل فيه.
انا مش ضد ان لواتشديت لفكر مجموعه عمل اجتماعي انك تنمي ليهم او تساعد في نشر الفكر بتاعهم ،بس لازم المجموعه دي تكون مجموعه عمل مجتمعي تخدم كل الناس ورسالتها تكون لكل طوائف المجتمع مش رسالتها تبقي لفئه معينه،زي مجموعات الحفاظ علي البيئه او مجموعات التوعيه الصحيه او محو الاميه......طبعا الكلام ده في خيالي لاننا لسه في مصر يعني المجموعات اتعملت علشان تقسم الناس مش تجمعهم!!!!!!!!!
اما المجموعات اللي انت اتكلمت عليهم وهما دول الموجودين في الواقع،فأنا أؤيد جدا انك قررت تقاطعهم كلهم،مفيش حد فيهم هيفيدك ،
ولو انا عرفتك كويس هقول انك مش الشخصيه اللي ممكن تنتمي لاي فكر من اللي انت قولت انهم موجودين في الجامعه،وده ميمنعش انك تحبهم كلهم:)))
احب الكل ا واحترم الكل , شكرا لتعليقك
ردحذفمقال رائع
ردحذفياريت بس ارجع المدرسة مش ايام الجامعة
ردحذفشكرا لتشجيعك و تعليقك , اتمنى ان هذا المقال يغيّر عقول كثيرة مغلقة و تافهة و فارغة
ردحذفبس مش معنى المدرسة يعني ؟؟
ردحذف